شد ليا....نحسك ليك - ج 1 - : المقدمة

شد ليا نحسك ليك : المقدمة

من الحوايج لي طججوني من كثرة النقاشات "زعما الجادة" في طويطغ و الفايس هي انك وليتي تتلكا بنادم كلشي عالييم في كل الميادين من السياسة والأدب الروسي تال وصفات القبول وجلب الحبيب والجاوي وصالابان... مواقع التواصل الاجتماعي تحولات لمواقع الرفس الجماعي...أغلبية الناس لي تيصنفوا راسهم أو تيصنفوهم الناس في الاعضاء النشيطين أو "المؤثرين" أصبحو يمارسون نوع من ديكتاتورية الرأي، ولي تيزيد يقود السوايع هي تلكم الجيوش لي تتدعم هاد الناس إما اقتناعا بأفكارهم أو لعقا وتقربا ليهم أو سعيا لنهود الجنديات و زناطيط الجنود أنفسهم فيما بينهم...ملي تنجي "أنا" (شوية العياقة) بصفتي فهاماطور من درجة فارس متفلسف مخوار تنحاول نفهم علاش ولينا هكذا : تتلقى بزاف ديال الأسباب و كلها مترابطة فيما بينها.

ملي تتطل من السطح على مواقع التواصل الاجتماعي تيبان لي أن دربكم تحول لسوق ديال الفراشة، كل واحد حاط السلعة دياليو وتيبيع ويشري في عشوائية...

سويقة فيها مالين الكورة ومالين التحليلات السياسية وانظمة الحكم ومالين الاقتصاد والبورصات، ومالين "الجورننات" الصوحفيين، وملي تتسرح رجليك فهاد السويقة تتلقا فراس الدرب شي حلاقي ديال مالي الفن والجيوش الفنية وسفيرات المغرب في بلدان الزيرو والمتناحرات مع الجارات الجزائريات في جبة الديبلوماسية الموازية مقابلين مع مالين البال ديال الشعر والخواطر والدروشة والحكم، و مرة مرة تيبان ليك شي مسطين تيدورو فالسويقة تيهدزوا وما عاجبهم حال...

وكاع الكراجات ديال الدرب كرواهم مالين العلامات الزرقاء وأصحاب الحسابات الموثقة  أو خوتنا لي تيزوروا الروجيستر دو كوميرس و تيشريو المتابعات أو بعبارة أخرى الجمالة ديال السويقة لي تيتقدى من عندهم الشناق وتيعاود يفرش باش يبيع ويشري، ويضبر على مصيريف من الايكات والجيمات والريتويت ولعل وعسى شي كليانة فيها الفارة تيقصر بيها في الليل على الخاص أو شي كليان باغي يفش الخصية ديالو...

هاد السوق الوهمي لي كان الاصل فيه هو يتلقاو ناس فيه وكلشي يبيع ويشري وبدون خسارة تحول لسوق نخاسة ولي ولا تيتباع فيه بنادم : يا بنادم تيبيع فيه كرو أو تيبيع عديانو...ومن بعد ما كان الاصل فيه نقاشات فكرية ثقافية ترفيهية، أصبح حلبة لصراعات صعيب نصنفوها فالصراع الايديولوجي لأنها تحولات لحروب شخصية ومن بعد ما كان خاص تكون الحجة والدليل والبرهان هي السلعة الرائجة أصبح الساركازم وسينيزم العوج هو لي شاد السوق...سوق كلشي فيه عند راسو لاصيان فالبيع والشرا وهو فالحقيقة غ شناق فراقشي ما تيزكل ت واحد...

هذا هو الواقع لي تيبان ليا أنا فمواقع التواصل الاجتماعي و يمكن نكون غ تنركع..ولكن باش ما نكونش ت أنا غ شناق باغي يبيع هاد السطورة فالسويقة (وريتويتك خشيه فكرك ههههه) غ نحاول فهاد السلسلة ديال "شد ليا نحسك ليك" باش ننحلل النقاشات الجدالية التواصلية و نبين اننا كلنا تنطيحو في "مغالطات منطقية ARGUMENTS FALLACIEUX" تتزيد تأزم الامور وللعلم هاد المغالطات المنطقية راه عالمية ماشي غ حنا المغاربة لي تنطيحو فيها وهي معروف عند الناس لي تتهتم بعلم نقد العقل والمنطق و منها :

1. الشخصنة في الحوارات و النقاشات
2. حجة السلطة والاحتكام إليها
3. التماس العذر
4. التعميم الخاطئ
5. مغالطة العزافة
6. تغليب العطفة على العقل في الاستدلال
7. الشعباوية
8. الترهيب والرعب والدراما الاستدلالية
9. يا أما و يا أما
10. وغيرها من المغالطات...

حنا ف هاد الستون غ نحاول نجبدو مغالطة ولا جوج فالنهار و نفرتتوها ونفهموها ونعطيو أمثل من تغريدات و فلخر هادشي كامل غير داخل فإطار السويقة و الهاك وااارا ما فيها حزارة...

تهلااااو