الفهاماطور والنكفات

الفهاماطور والنكفات

غالبا بنادم ملي تيمشي ل مواقع التواصل الاجتماعي تيحاول يقلب على ناس تتشاركو فالاهتمامات ديالو وتيحاول يقلب على الجديد ويقرقب الناب مع الفوطوكوبيات ديالو، مول الكاورة والرياضة مع أصجاب البطولات، و مولات الشهيوات مع الحادكات إفتراضيا، ومول الضحك والتقشاب مع الحلايقية والمْسيْيحين الرقمين، ودوك لي قراو شوية د الفكر والأدب مع اصحاب العومق والتفكير النقدي والكريتيك، والرفيقات مع الرفاق، وأصحاب مجالس الذكر تيقلبو على روضات الجنة الرقمية وووو غير هو مع المدة بنادم تتطلع ليه فراسو هاد الزاوية ديال التخصص في مجال محدد حيت التفاعل ضيق مع حفنة صغيرة ديال الناس، ومع تكاثر المتابعات بنادم تيقلبها تحليل سياسي وأخلاقي واجتماعي وأدبي وفلسفي وطبخي ووو وأي حاجة يمكن ليه يناقش فيها حيت هاد السوق فيه الرواج و"كلشي" تيفهم فيه وساهل يبان واعر فيه، شغل الرسوم المتحركة ديما تيطبل للحق وتيعاير الباطل و ها هو من الفرقة الناجية والمقادير ديال هاد الكيكة ديال التحليل ساهلة وعامة والشاملة وهي كالتالي :

• - جوج كيسان ديال الحرية الفردية
• - ربعة د لمعالق ديال الديمقراطية
• - نص كاس ديال الحقوق الدستورية
• - نص كيلو ديال المساواة بين الرجل والمرأة
• - مية غرام ديال المواطنة والسلوك الحضري
• - كاس صغير ديال التنديد لي طالع فالطوندونس
• - معلقة كبيرة ديال المقارنة بين الواقع المعاش والغربة
• - ولا حبدة شوية الكيف وطابة وقهوة كحلة (لاوازم التقديم والضرب على الشعا)

تيشد هادشي كامل وتيخلطو فبانيو صغير لمدة قصيرة ومرة مرة تيرشو بشوية التمنييك والساركازم باش تبان عميق وحلو وإلا خفتي المذاق ما يعجبش الجميع يمكن ليك تزيد شوية ديال Second Degré باش تجي ساهلة فالصريط.

طريقة التقديم ساهلة يا تحطها حْرْفية مع شي هاشتاق ديال الوقت، ولا كنتي عندك الماعن مجهدين ديال الفوطوشوب تحاول تزوقها بشي Troll ولا شي memes  وبالصحة والراحة عليك الريتويت واللايكات وسمعة التأثير، ولا ربما تضبروا فشي واحد ولا وحدة مجمك فالطياب يطلب منكم "يكال ليكم أو معاكم" الحلوة أقصد الكيكة الفهاماطورية.

الفهاماطوريزم الجديد

الا بغينا نرجعوا شوية اللور غ نلقاو ان المذهب الفهاماطوري قديم بزاف وأول من اشتهر به اليونان كنت دويت عليها شحال هادي فالتعريف ديال السوفسطائية (رجع قرا اشنو كتبت فهاد المقال على Le Sophiste) وفكل العصور كانت الفئة موجودة والجديد فهاد العصر هو ان هادشي ولا رقمي أي يكفي أنك تتصفح شوية ويكيبيديا وبعض فيدوات "تطبسيل" أقصد تبسيط العلوم باش تولي فهاماطور موسوعي وقائد فالانبهارية مع احترام فن الجدال، لي تيرجع الفضل ليها للكيكة العميقة ديال عبيقة الشبه موثقاف.

ملي تيولي الوضع بحالماهوكانيات تترون الامور، وكلشي تيجدب وكلشي تيعبر ويعبز، الافضل ليك أخي "الفهاماطور القديم بحالي" لي خدا عيلم من الكوتب الصفراء والبيضاء والفوطوكوبيات وطاب ليه زكو بالبحث المنهجي أنك تهرب بقزيبتك وتبعد من البشار وبلا داك التواضع ديال والو وداك التهلال ديال زعما النقاش مع الناس يمكن يأتي بنتيجة وتصحح الرؤية...هاد التواضع ما خدامش لعدة أسباب منها :

- إلا كنتي تتعتبر راس موتقاف وفاهم الوضع وأن الناس متخلفة وكذا، دير فراسك أنك انت براسك بالنسبة لناس آخرين لي كثر منك علما وحكمة وتجربة راك غ تتخور بل ومن الرعاع.

- أنت ماشي مسؤول على جهل الناس وماشي النمر المقنع ومجهوداتك في محاولة توعية الغير ما هي إلا زملة تيحركها حب مدحك من طرف غيرك كونك تسعى لتخلص العالم من الشرور.

- يمكن غدا ولا بعد غدا يبان ليك كاع داك الحزاق لي تتدافع عليه غ تخربيق وأنك مقولب و تولي ضحكة نظرا لتهورك...إذن لا تتهور كي لا تتخور.
 

هو صعيب على بنادم يطيح كواريه ويتكالما ويبعد على شغل التنكاف ديال طويطر ولا الفايس، حيت دوك اللايكات والتغريت والمدح ديال الناس أو الاصدقاء تيدغدغ ليك الأنا وتيعيشك فالوهم وتيولي بحال "الهية" وتيخصك يوميا لادوز ديالها...وتينسى أن الناس غالبا تتعامل بمنظور الصواب والنفاق الاجتماعي وانت عد راسك درتي الطايلة، داكشي علاش تتلقا بنادم مبلي الله يعفووو وتيطلع ليه الدم إلا عصر مخو مع شي لعيبة وما سوات والو فالسوق ديال الايكات ولا شي حد بلوكاه ولا ألغى المتابعة ديالو...هادشي بلاما ندوي على عقلية القطيع وانك بزاف ديال المرات تتبزز على راسك تشوف التخربيق وتبقا ساكت حيت الا دويتي غ تولي العدو واخا أنا غير ناجح فهاد القضية والدليل أنني مقود السوايع مع الجميع إلا القليل.

ما يمكنش ليك أخويا تكون واعي بالجهل ديالك وانك ما عندكش الاجابات على جميع الاسئلة والمشاكل وتستمر فهاد الفوضى وهاد العبث وتضيع فيه وقتك...إذن الحل هو أنك تشد المركوب وتمشي لسوق كرك وتحاول تجيب تسويقة جديدة لي تصاوب بها شي كوامل وطواجن ملاح تحيد بيهم الهيمري ديال الجهل لي قاتلك...