الذكر الأخير : راك غادي فالخسران آآ حمادي –الجزء الثالث-

الذكر الأخير : راك غادي فالخسران آآ حمادي –الجزء الثالث-

خفيف ضريف...

المشكل لي عندي مع الذكر الأخير وخصوصا المغربي هو أنه تقبل فكرة أن في المجتمع "الراجل راه مساوي للمرأة" وانهم حاجة وحدة ولي تيقدر هو يديرو ت هي تتقدر تديرو و المهارات ديالها هي في متناول الرجل وخاصو يدير لي تدير هي باش يبان بصورة حداثي كيوت حنون عطوف ووو حيث هاد الصفة ديال "الحداثي أو الحواذاتي" ولات FOND DE COMMERCE عند الذكر الأخير تيسهل عليه متاعب الحياة أو على الأقل تينقص ليه جزء كبير من المسؤوليات الملقاة على عاتقه.

المشكل ماشي فكون راجل قرر يتنازل على الطبيعة ديالو للأنثى ديالو، المشكل كيما خلاها الرابور مسلم "أعمق وأبعد" من هذا، هو ان الرجل لي باقي تيآمن بالذكورية ديالو وثقافة الفحولة لي تتدير فرق بينو وبين المرأة ولا تيحس براسو مضطهد من طرف هاد التيار، مضطهد ماشي من باب المظلومية غ من باب الوصف...الراجل لي تيحك عليه تيفرع مو... كما انعه ما بقاش عندو البوصلة باش يعرف راسو شكون هو وشنو دورو فالمجتمع فالأسرة وحتى فالكوزينة وبيت النعاس وإلا جا يدوي على راسو تيتسمى ذكوري متعفن...رجعي...تقليدي ومتخلف وداك الهبال ديال : "حنا ف 2018 وبنادم باقي بلابلابلابلا" و الطامة الكبرى أن المرأة لي باقة الفطرة ديالها خام وسليمة ولات تتعاني من هذا الذكر المستأنث لي ولا باغي يتزاحم معاها فمجالها...دابا بداوها بالطبخ والاشغال المنزلية وعم الله فين غ يسالي هادشي، راه سمعت ولاو تيشدو معاهم النوبة عند الوافورات باش يديرو لاصيغ ويصاوبو ظفارهم ويصبغو شعرهم.

مشكل الاستئناث مشكل حضارة

الحضارة مبنية على القوة والشجاعة والحروب ماشي بالورود والقلوبة الحمرة لي هي رمزة الانوثة...ترامب مخري العالم ماشي حيث كيوت ومسالم ولكن جد واعي بالقوة ديال الدولة لي تيترئس وكون جا يعول على المواثيق الدولية والمعاهادت كورا الميركان خراها مشتت... البقاء للأقوى وانتم تتشوفوها يوميا بل وحتى في نضالكم أيها المستأنثون تستقوون بالأقوى على خصومكم : ميريكان زوينة ملي تتزمط السعودية ولكن ترامب خايب وسيكسين وماتشو ملي تيدوي على الذكورية (اللوجيك ديال الترعوين). نهار غ تنوض "الحرب العالمية على الماء" ديك الساعة سيفطو الذكر الكيوت يجيب ليكم جغيمة من عند الماتشو الذكوري، راه كنت دويت على المشكل ديال القوة العسكرية ومشكلتها مع انخفاض نسبة الفحولة وتفاقم الايديولوجية الوردية.

مغالاطات المستأنس المغربي :

ملي تناقشو موضوع الفحولة والذكورية مع المستأنت المغربي ديما تيحاول يخرجك من السياق العام وتيبدا يجبد ليك تبريرات حنونة تذغذغ الاحاسيس وانطلاقا من تجربته الشخصية...تيخرجك من اشكالية أن للمرأة معين دور فالأسرة والمجتمع إلى نقاشات جانبية على تفاصيل تتميع النقاش. 
الفكرة واضحة : "الرجل دوره في الأسر هو المسؤولية المادية وحمايتها ويعيش أسرته في السعادة والدور ديال المرأة هو انها تتعاونو فهاد المهمة بالقيام بدورها حسب قدرتها فيبيتها بتربية الابناء والاعتناء بزوجها لأن الهدف ديالهم بجوج من الزواج هو نشر الجينات وخاص هاد الجينات تكون طبيعية ومتوازنة"

المغالطة الأولى : عمل المرأة 

المرأة تخدم ماشي عيب ومزيان ليها تكون قبل كاع من الزواج تكون قادة براسها ومستقلة...ولكن أسي المستأنث باش تنوض انت تقلب على مرا خدامة وتبان ليك فيها الهمزة وتتزوجها وتبقا انت فالدار وهي تتضرب تامارة لااااا...كاين بزاف ديال الحالات كثيرة لي الزوج لي باقي محتافظ بالرجولة ديالو ولكن وقعو فضائقة مادية أو تافقو من الاول على انها تبقا خدامة من بعد الزواج وهادشي واقع وماشي عيب شريطة تتبقا فالدار لكل مكانته...يعني فالدار الراجل راجل والمرا المرا.وكاين النوع الثالث لي بسبب تضخم الصالير ديال الزوجة تتولي هي مولات الدار وهو غ معاونها وبلاما تيحس تيولي تيحاول يعوض النقص فالصالير للحداكة لالة مولاتي وجرعة زائدة ديال الحنان والعطف المتصنع وتيولي تيدير مجهود كبير باش يرضيها وهي تتبدا تقطر ليه فالصلاحيات ديالها وهذا النوع هو لي تتلقاه غالبا فالمحاكم الاسرة.
 إذن بلاما تحاولوا تسوقو للناس أننا ضد عمل المرأة.

المغالطة الثانية : الاعمال المنزلية

هاد المغالطة هي امتداد لمغالطة النوع الاول والثالث في مسألة عمل المرأة. يعني المستأنث ملي تيصيفط مراتو للخدمة (رب البيت) غ يكون عندو فراغ إذن تيحاول يشغل راسو بالشقى والتخمال ويلعب دور "مربية الأجيال" وهادشي تيخرجو من طبيعته الذكورية لي مبروكرامية على الاعمال الشاقة إلى طبيعة أستئناثية وهادشي لي حنا ضده...أو أنه تيحاول يغطي على عدم توازن القوى الصاليرية بالحداكة والمساعدة. أما كون زوج طبيعي رشقات ليه واحد النهار يطيب طاجين كيفما كان تيدير فالحي الجامعي أو ناض صاوب شواية ديال السردين حيت فيه الريحة ومبغاش مراتو تتكرفص فإطار الخروج من الملل والروتين مسألة عادية، بلاما ندويو على المرا ملي تتكون حاملة أو مريضة أة مسافرة....وزيد عليها الشهيوات لي معروفين بهاد الرجال من شوا وطنجية وطواجن ديال المعزي....هادشي عادي و واقع...

أنا احسن حاجة تتعجبني هي فالعيد الكبير من تنتكلف بتقطاع الدوارة وتنعاون المدام فالتكراض ديال الحولي حيث تيطلب قوة ومعرفة ديال من أين تؤكل الكتف وحيت داكشي ثقيل غ يقصم ليها ظهرها ولا تتكون كالس فالصالون وتعيط ليك تهز معاها السدادر ووو...إذن أسي المشتأنث الا كنتي ربة بيت  A TEMPS PLEIN OU PARTIELبلاما تتخبا ورا الاستتناءات ديال الرجال ديال بصح.