محنة الدجاجة بلا بزازل و تعفيرة البايرة مولات 7 خطبات

محنة الدجاجة بلا بزازل و تعفيرة البايرة مولات 7 خطبات

البارح كنت مجلي ف الفايفي القروية الزمورية ناشط مع الكسيبة وناسها ولا تنحاولو نلعبوها ناشطين باش ما نبقاوش نخمموا فالشتا لي تعطلات والكسيبة لي دخل معاه الجوع وخريف لحصايد والنخالة لي تزادت فيها خمسمية د زيال فظرف 20 يوم والبلاد لي باقا ما تحرتات و غيرها من هموم الفيافي القروية...المهم ما علينا...ملي عكبت للمحال وخدمات الكونكيسيون كالعادة تندخل نضرب طليلة على الكونط ديال ف تويتر باش نشوف واش حشا ليها شي واحد على دوك التغريدات الخرائية ديالي وداك التهلال الغير واقعي ديالي ولا واش كاين شي أجوبة ولا فاف ولا شي ريتويت في أطار دغدغة الأنا وشوية العياقة التويترية...مع تنحل المشقوف تنلقاها شاعلة وخبر وفاة 15 مرأة على اثر تدافع على شيت فرتيت ديال الدقيق والموعاونات تيفرقهم واحد خونا باسم شي جمعية...الخبر مقود وجد مؤلم ملي تتشوف بنادم تيموت حيت جاي ياخد كفة ديال التقدية تطير ت تطير ما تفوت سبعلافريال وهادشي تيمرض فالقلب.

المهم وكيما ولفنا ف مثل هاد الاحداث الدرامية والتراجيدية عدد من المغردين تيبغيو يستغلو مثل هاد الاحداث باش يهبطوا للسويقة ديال الدرب (لي كنت دويت عليها ف شد ليا نحسك ليك) ويفرشو التويتات ديالهم لعل وعسى يرمموا صورتهم لي تتنخر بفعل الواقع والزمن ويضبروا مصيريف من الريتويت والفاف واللعق في إطار السباق نحو "الثأتير الوهمي" فمواقع التواصل الاجتماعي : دعيناك لله أ لارام خرجتي على الناس بديك العزلة ديال زيارة طائرة  Dreamliner هههههه ولا كلشي تيقلب على العباسية.

الحاصول مالي تتشوف التايم لاين تتلقا بنادم تيعصر دماغو باش يكتب زعما شي تغريدة يبين فيها "إنسانيته المفرطة" في القضية وكل واحد تيحاول تكون "الانسانية" ديالو مؤطرة بالتوجه الايديولوجي ديالو....ولي ما عند جد بوه توجه تتلقا يتأرجح بين "التوجه الايديولوجي ديال TL".

المهم أجيو نشوفو أهم المواقف أو الزوايا لي تشافت منها الفاجعة.

1. التنديد ديال مالك مزغب :

مول هاد التنديد من دوك خوتنا لي "أنتي مخرن" وضد النظام لي ما تيزكلو ت شي كارثة وطنية باش يخرجوا يشرملو الدولة وخا ما تتكونش عندو جميع المعطيات الحقيقة حول المسألة ويمكن يكون غ فيديو ف شوف تيفي ديال كسيدة وتعطلات لابيلانص ولا غير شي فيضانات تتغرق شي بلاصة تيردوها قضية رأي عام وتيربطوها بالدستور وعدم احترامه للتوقعات المناخية...هذا النوع من المنددين كيفما كانت القضية عندهم ديما فيها نفس التوجه ونفس الديسكور ونفس الكريتيك ألا و هو التشرميل ديال الدولة...ملي تيعيقوا بالكريتيك الخاوي تينوض يبرد علينا بديك النويطة ديال : "أنا راه بغيت غ الخير لهاد البلاد وهادشي لي تندير راه غ غيرة على البلاد وبلا بلا" وهو فنفس الوقت تيضرب الطر لمطرطر لهاد بلاد واي حوار معاه فالقضية تينزل عليك بكونك غ عياش و مرايقي...بحالة زعما "المعارضة" ما فيها مرقة. (هذا الموضوع ديال التمراق ديال المعارضة غندويو عليه فوقتو).

2. التنديد بهمجية الفقر والفابور:

كان واحد التوجه في تقييم هاد الكارثة...اناس ثاروا على واقع المغربي ملي تيشوف شي حاجة فابور..أصلا الفابور تيغري جميع الناس من الصدقة والسعيا فالفوروجات و البروموسيونات ديال مرجان وتيصالات وميديتل واينوي تال العباسية ديال سناك خانز وبنين ولا خونا lpingouin  لي تتجيه البولة ملي تيجي السرباي يتخلص.

هاد النوع من التنديد يتسم بالواقعية لكون بنادم ما تيعقلش على خوه ملي تتكون القضية فيها الفابور وانه يمكن ليه يعفط عليه باش يوصل للهدف ديالو...راه المسلمين المرفحيين مخلصين زبالة فلوس وتيتدافعو فالحج....وزيد عليهم تدوك خوتنا لي تيسعاو الذهاب مع الوفود الرسمية فالملتقيات الدولية الاعلامية و الرياضية.

3. التنديد بالدفاع وحرب المسؤوليات :

هاد الحرب ديال تلصاق المسؤولية كلها حاولت تجاوب وعلى السؤال ديال المفتش كرومبو : علاش الناس ماتت ؟ وراكم عارفين الاقتراحات لي تيعطيها المفتش كرومبو شحال ذكية.

• الفقر : يعني هاد الجواب ما كاينش شي واحد غ يعارضو مادام الناس لي كانو مستهدفين هم طبقة فقيرة...واخا فالواقع كاينين ناس لاباس عليهم و رغم ذلك تيتزاحمو مع الفقراء فعدة مناسبات وأقوى مثال هو داك خونا لي تيقطع الطيارة وتيمشي للعمرة يسعى الزكاة...فإطار الهدرة على الزكاة راه كاين لي ربط هاد الفقر بكون الناس ما بقاتش تتزكي...وهادي هي تتسما تغطي الشمس بالغربال لأن الشرع مافيه الانتقائية...يا اما تطبق الشرع كلو ولا هنينا...اما نبقاو نلعبو على وتر الايمان والاحسان لااا.
• المناخ وتأخر الامطار : الشتا تعطالات و ناس ولات فمشاكل إذن خاصنا نفكروا فشي حل : اللوجيك في أبهى تجلياته...يعني ملي تتربط حادثة محلية بتأثر بقوة قاهرة مناخية راه طوووب ديالا للوجيك.
• القدرية : كالك اسيدي هادشي مقدر ومكتوب والمكتوب ما منو هروب والله يرحمهم وسدات مدام و بلا فتنة...هادو الناس ديال التقوى و شدها منين خفافت.
• اللحايا سباب المشاكل : ملي بان واحد الفيديو ديال رئيس الجمعية لي منظمة هاد التوزيع ديال الموعاونة بان ان خونا من أصحاب "ارخوا اللحا وحفوا الشوارب" وهنا ناضو الناس تينزلوا على الباجدة...حيت عارفينهم تيستغلوا هاد الفقر في ربح الاصوات الانتخابية وهادشي كاين من موائد الرحمان تال عمليات الختانة الجماعية وووو من بعد ناضوا الباجدة كالو ليهم راه خونا كان مع البام...وهنا بنادم نسا الفاجعة وبدات حرب التراشق بالمسؤولية...

وبهاد المناسبة عندي مشكل مع التنظيمات الدينية لي تتنظم حملات "الصدقة" تدير ليها اشهار ومكان تجمع...مع العلم ان ديننا تيركز بزاف على "سرية الصدقة" وتجنب الرياء لما لذلك من حفظ كرامة الفقير و تجنت كبرياء المتصدق...ما فهمتش علاش ؟ تيديرو هاكذا ؟ الا كانت هاد العمليات تتم تحت اطار جمعيات غير باش يستافدو من الدعم...راه ما بقاتش صدقات.

• واش عندهم الرخصة : المثير فهاد الفئة هي ان هاد الفئة لي ركزات على الجانب المسطري هي نفسها لي كانت تتبكي وتتشكي من صعوبة المساطر في "القوافل الطبية" وتوزيع الكواش فالجبال والمناطق الثلجية وان الدولة ما تتخليناش نعاونو الناس ودابا جاي تيتسائل على قانونية العملية...تنظن دابا عرفتي علاش الدولة تتزكر مثل هاد العمليات....

المهم طولت عليكم من الفهامات ديالي (عجباتك هي هاديك ما عجباتكش عاودها لكرك)...وهادشي هو لي شفت ولي متافقين عليه كلنا هو اننا عندنا مناطق فيها الفقر والهشاشة وان هادشي خاصو يتلقا ليه حل و الحل ماشي ساهل راه خاصو قوامو والقناعة لي خرجت بيها أن البلابلا ما بقاتش خدامة واننا خصنا نكونو واقعيين فتحليل الوضع وعدم اغفال أي جانب من جوانب المشكلات باش تكون الحلول المقدمة ناجعة وتعطي نتائج وديك الركوب على أي كارثة باش تصفي حسابتك مع خصومك راها قمة النذالة وخليونا من محنة الدجاجة بلا بزازل وتعفار البايرات و الله يرحم دوك النساء لي ماتوا ويصبر عائلاتهم والله ياخد الحق فلي كان السباب.