"البلبولة بالرمان"

آش هاد الوقت ؟! مالها تبدلات والناس كشفات، عشنا وشفنا بنادم فالبار ويحلم بسبع حجات، سمعني أ الفقيه راه فمك خنز بالكذوب و حسنات نهارك فالعشوية تذوب، هي ڭالت انا نسوا من الراجل واحد وزيد ت النص النسا جاروا وبغاو يقطعوا فينا النفس... هذا زمان الطمع واللهفة، الغش وتميال الكفة، الغدر وقلة العفة، الفوحان بلا شكارة ولاعبها أمير الأُمرا، مال بزولة الحشمة غرزات وخابية الحكمة وكحات ؟! هو يسبح بالاخلاق و نص عائلتو معاهم فشقاق وصابر مع النص لاخر غ نفاق

عشنا وشفنا

"البلبولة بالرمان"

المغربي مالو ؟ آش طرا ليه ؟ مالو تلف وما بقاش عارف آش باغي ولا حتى شكون هو فهاد الكوكب المغيس....

المغربي فالأصل كأي انسان عزيز عليه راسو وفيه حب الذات والملذات باغي يكون ديما زوين وكلشي يڭولها فيه زوينة...بحال داك الستون ديال ولاد الدرب ملي تيكونو راجعين من التراويح هازين الصلاية على الكتاف...تتلاقا معاها تيدير فيك ديك الشوفة زعما انا واخا مستيلي و ولد الوقت راني انسان صالح وتنخاف الله.

هاد خونا ديال التراوح هو نفسو المعلق الفيسبوك-التويتري الخارق لي تيكلاشي كلشي و هو لي عندو انستغرام لا علاقة له بواقعه...

وهو لي تتمشي ليه نص الروشارج ديالو فمواقع بورنو

وهو نفسو لي أنتي مخزن وداكشي ديال عزوز ملي تتوقع شي روينة سياسية فالبلاد ونهار تيشد الديپلوم تيمشي يدفع للوظيفة العمومية... باش يلصق فالدولة...

وهو الزلال لي عندو العشيرات بالعرام ولكن ختو لاعبها عليها فتوة...

وهو لي تيظل يهلل بالديمقراطية والمواطنة والحكامة الجيدة ولكن هانية يحرك الفوروج وينقص السرعة ملي تيقرب للرادار ويعفط ملي تيفوتو...

هو لي يطالب بمزيد من الحريات الفردية وحقوق الانسان ولكن الزغب ديال شعرو تيوقف ملي تيسمع فلان تياكل رمضان ولا تيسمع أن ولد دربهم فيه نغزة آل لوط...

هو الأب لي تيحس بالافتخار ملي تيسيق خبار ولدو مصاحب مع درية وتيسهر معاها ولكن تتشعل فيه العافية الا تعطلات بنتو ساعة على موعد دخولها...

هو ذاك المناضل السياسي الحقوقي الشرس المنادي بتخليق الحياة العامة ولكن نهار تياخد المسؤولية تيحير ما بين البقع الارضية وامتيازات السلطة...

هو داك الصحفي الشرس المتخصص في الفساد ولكن يمكن بهدية يكتب مقال يلحس فيه المفسد...

هو الطبيب الشاب الخلوق البوڭوص الانساني ولكن الا جيتيه فوقت مشربن فيها يقدر يكتبت دوليبران وانت فيك بوصفير ودم سنانو يمشي يخدم فالفيافي...

هو...

والأمثلة كثيرة على هاد الروينة وهاد السلوكات المفروحة لي تنعيشوها...

تيجيب ليا الله بحال المغربي مسكين تلف وتخلطو ليه العرام ديال المبادئ التقليدية-الدينية-العرفية و المبادئ الحداثية ومظاهر الحياة العصرية...وتيبغي يلعبها وسطية بيناتهم حتى ناض صاوب لينا "البلبولة بالرمان"...

هادشي لي قريتي الفوق يمكن نكون أنا أو أنت وغيرنا... ملي تنجبدو مثل هاد الظواهر الهدف ديالنا ماشي باش نبانو واعرين وكدا وان الغير هيبوش وبوزبال قادوسي ! لا... رغم أن القادوسية فكراخترق جميع طبقات مجتمعنا...

حنا بغينا نعرفوا علاش هاد الازدواجية في التفكير و معارضتها للواقع... أشنو هو لي خلا فئة كبيرة من المجتمع ولات طيرة بڭر... ما هي غربان ما هي سرب حمام...والسلام